Kura Reo ki Raukawa 2010
Tēnā koutou, tēnā koutou, tēnā rā tātou katoa!
E ngā mātā waka, e ngā waha o tēnā marae, o tēnā marae, puta noa. Ka tū anō tō tātou Kura Reo ā te Apereira e haere ake nei. Nō reira, kia horo, kia kakama te whakakīkī mai i tō ake puka whakauru e mea ana, āe, e haere mai ana au ki tēnei tauwhāinga. Ānei rā te wāhi hei tiki i tāu puka rā.
Puka Whakauru
Hei āwhea: 11-16 Paenga-whāwhā
Ki whea: Te Marae o Papa o te Aroha, Rori Mossop, ki Tokoroa
Kei roto ngā whakamāramatanga katoa i te puka whakauru i runga ake nei.
Whakapā mai rānei ki a Tangiwai Amopiu
Kura Reo Ki Raukawa 2009
19/04/09 - 24/04/09
Kei aku manu mātārae, kei aku manu kātua, tēnei rā ngā mihi maioha ki a koutou. He mihi ka tika ki ō tātou mate huhua o te wā, ki te hunga kua huri kanohi atu, kua huri tuarā mai ki a tātou. He huihuinga tāngata, he hokinga Mahara, he riringi roimata, he hotunga manawa, ka ea a aituā. Nō reira, haere atu rā koutou. Ka whiua noatia he urupounamu ki a tātou, ngai Māori, “he aha e hapaitia nei e tātou tō tātou reo rangatira?” He nui ngā whakaaro o ia tangata, ā, he maha hoki ngā ara ki te hapai, ki te whakamau i te reo. Ki a tātou ngā uri o Raukawa, ko te kura reo ki Raukawa, he ara tika, he ara tūturu, ki te ako i te reo. I te rātapu, te 19 o Paenga-whā-whā, i Pōwhiritia te toko maha o ngā tauira me ngā kaiako ki te ako ki te whakaako rānei i te reo. Nui atu i te kotahi rau ngā tāngata i tae mai ki te kura reo, ki te whai i te iti kahurangi, tae noa ki ngā taiohi, me ētehi o ngā kaumātua e tautoko ana i te kaupapa hirahira nei. Tēnei te tau tuarua i kawe nei a Raukawa Reo, tētehi wānanga o te Poari matua o Raukawa, i te kura reo. I ahu mai tēnei kaupapa, i te Rautaki reo ki Raukawa, ki te whakapai ake ngā uri, e tino matatau, e āhua matatau ana ki te kōrero Māori, ā, ko te kura reo tētehi kaupapa ki te whakatūtuki te wawata nei o ngā uri o Raukawa. “ko te reo kia tika, ko te reo kia rere, ko te reo kia Māori” koinei te wawata o Tīmoti Karetu ki a tātou ngai Māori ki te whai atu i ēnei pito kōrero, ā, kei reira hoki te wairua me te hē manawa, ki te kōrero i te reo Māori. Ka tuku mihi atu ki ngā pouako o te kura reo, ko Tīmoti Kāretu, ko Materoa Haenga, ko Paraone Gloyne, ko Jarred Boon, Ko Ngāringi Kātipa, ko Pakake Winiata, ko Sean Ogden, rātou ko Raukura Roa. Na rātou anō ngā tino māngai i te reo, e kaha ana ki te whakaako i ngā taumata rerekē ia tangata. I runga anō i te hūmarie me aroha mo to tātou reo, i reira rātou ki te whakatūtuki te kaupapa nei. Ko te tumanako inaia tonu nei, ko te āta mirimiri i ngā tuara o ngā kaiako o ngā kura katoa o te rohe, kia tāhuri mai rātou ki te uru mai i te kura reo ki Raukawa hei te tau 2010. Kia mau te reo, kia mau ki tō kakara te ao Māori, hei taonga mōu, he taonga mo ake tonu.
